DAVAO CITY – Gilayon nga miresponde ang mga sakop sa Central 911 sa mga residente nga nanimuyo sa Purok 23 Brgy. Sto. Nino, Tugbok ning dakbayan kaganinang kaadlawon human nga nasinatian ang pagsaka sa tubig baha nga hatud sa kusog nga pagbundak nga ulan kagabii.
Una na sab nga gibutyag sa mga sakop sa City Disaster Risk and Reduction Management Office, nga posibleng ang nagpadayon nga konstruksiyon sa gitukod nga gambalay sa usa ka subdivision ang usa sa mga hinungdan sa pagback flow sa tubig hinungdan nga misaka ang tubig baha sa lugar.
Miresponde sab ang mga personahe sa USAR Team sa Central 911 sa Purok 15 Brgy. Mintal Davao City pasado alas dose sa kaadlawon kaganina human nga nakasinate usab ug pagbaha ang mga residente sa lugar.
Pipila sa mga lumulopyo ang nagmagahi sa paghiklin gumikan kay dili nila buot nga biyaan ang ilang mga panimalay.
Kahinumduman nga dihang mibundak ang ulan pasado alas otso kagabii, ubay-ubay sab nga mga pasahero ang nangatanggong sa downtown area human nga gibaha ang pipila ka mga kalsada partikular na sa JP. Laurel Avenue, Matina area, Buhangin ug daghanan pa.
