Nakadawat og P100,000 nga insentibo sa Department of Social Welfare and Development-Davao Region kon DSWD-Davao ang duha ka sentenaryo gikan sa Panabo City.
Ang 100-anyos nga si Victoriano P. Crepo, residente sa Barangay Consolacion sa Panabo City, nakadawat og P100,000 insentibo gikan sa DSWD-Davao.
Sa susama nga adlaw, ang 100-anyos usab nga si Aurelia S. Chavez nakadawat og P100,000 nga insentibo gikan sa DSWD-Davao.
Gawas sa 100,000 nga insentibo gikan sa DSWD, nakadawat usab og P30,000 ang duha ka sentenaryo gikan sa Local Government Unit (LGU) sa Panabo City.
Ang inisyatibo kabahin sa Republic Act (RA) 10868, nga labing nailhan usab nga Centenarian Act of 2016, nga nagmando nga ang matag senior citizen kinsa niabot na og 100 hatagan og insentibo.
Nakalatid sa RA 10868 nga ang ‘eligible beneficiaries’ makadawat og gasang kuwarta nga nag-kantidad og P100,000 gikan sa national government pinaagi sa DSWD Centenarian Program.
Dugang pa niini, gawas sa cash gift, ang mga sentenaryo makadawat usab og Letter of Felicitation nga giprimahan ni President Ferdinand “Bongbong” Marcos Jr.
Samtang, ang namatay na nga centenarians pasidunggan gihapon uban ang Posthumous Plaque of Recognition, nga ihatag ngadto sa labing duol niini nga mga buhi pa nga kabanay.
Gipahibalo sa DSWD, aron nga makapahimulos sa gasang kuwarta, ang mga sentenaryo kinahanglan magpresenta og mga dokumento, naglakip sa birth certificate o Philippine passport.
Kung wala kini, mamahimo nga mogamit sila sa ilang Office of Senior Citizens Affairs kon OSCA ID, bisan unsang Philippine government-issued ID, o marriage certificate, ug uban pa.
