Nagpahimangno ang City Environment and Natural Resources Office (CENRO) sa publiko nga magmatngon batok sa mga nagpaka-aron ingnong basurero nga wala sa ilang listahan. Gipasidan-an sa buhatan nga adunay mga indibidwal nga nagpakaaron-ingnong taga CENRO, nangadto sa mga balay ug naningil og kwarta para sa giingong panagtapok.
Giklaro ni Engr. Lakandiwa Orcullo, ang Active Division Head sa Environmental Waste Management Division sa CENRO, nga walay pahibalo ug pagtugot ang buhatan sa maong kalihokan. Sa iyang pakigpulong atol sa Madayaw Dabaw program sa City Government of Davao, iyang gisulti nga ang mga nagpakaaron-ingnong empleyado wala sa opisyal nga masterlist sa CENRO.
Gipahinumduman usab sa CENRO nga ginadili ang bisan unsang porma sa pagpangayo og kwarta o solicitasyon sa ngalan sa ilang buhatan. Kini usa ka klarong paglapas sa Code of Conduct and Ethical Standards for Public Officials and Employees, hinungdan nga gikinahanglan ang kooperasyon sa katawhan aron masayran dayon ang mga suspetsado.
