Nagpadayon ang City Environment and Natural Resources Office (CENRO) sa ilang mangrove planting activities sa baybayon sa Barangay Talomo Proper sa Talomo District.
Ang maong aktibidad gitambongan sa mga representante gikan sa mga nagkadaiyang opisina sa lokal nga gobyerno sa Davao.
Human sa pagpananom og 2,000 ka mangroves kaniadtong miaging bulan, nagdugang pa karong bulana ang buhatan og 3,300 ka mangroves.
Ang mangrove planting nga inisyatibo nagsugod kaniadtong 2023 ingon man kabahin kini sa mga pagpaningkamot sa lokal nga gobyerno aron mapalambo ang pagpreserba sa kalikupan, mapataas ang kahibaloan sa publiko, ug awhagon ang mga lokal nga opisyales sa gobyerno alang sa pagpanalipod sa mga coastal ecosystems sa Davao City.
Gipasabot ni Christopher Asibal, ang Development Management Officer sa CENRO, nga ang tumong sa pagpananom og mangroves mao ang pagkuha og carbon ug pagpakigbatok sa global warming pinaagi sa mga mangroves, nga nagahatag usab og presko nga oxygen ug makatabang sa pagpahimulos sa kahimtang sa baybayon.
Gibutyag usab sa opisyal, nga magpadayon ang pagpananom sa buhatan hangtod sa Agdao District ug tulo ka klase nga mangroves ang ginatanom niini nga mao ang Api-Api, Pagatpat, ug Bungawong, inubanan sumala pa sa mga kahoy nga susama sa Talisay ug Malibago alang sa mga open beach areas.
Gibutyag usab ni Asibal nga mas daghan ang giandam nga tanom karon gumikan sa mas daghang tawo na ang andam nga mulambigit sa maong kalihukan.
