DAVAO CITY – Gipasalig karun sa City Environment and Natural Resources (CENRO) nga pahugtan na nila pagbalik ang pagdakop sa mga indibidwal nga dili mutamod sa Solid Waste Management sa dakbayan.
Una ng nasayran kang Engr. Marivic Reyes, head sa Cenro nga temporaryo una nga nahunong ang ilang mga operasyon kini human ang nasinatian nga pandemic sa dakbayan sulod sa halos duruha ka tuig.
Apan karon nga mas lu-ag na ang alert level, ibalik na nila ang pagpatuman sa balaudnon diin partikular nga mag-atubang ug multa kadtong wala naglabay ug basura sa tukma nga oras ingon man kadtong wala gitarung ug pagbahin-bahin o gi-recycle ang mga basura.
Una na sab nga nasayran sa opisyal nga gidungagan na sab karon ang ipahamtang nga penalty sa mga malapason diin gikan sa P300 himuon na kini karun nga P500.
Samtang sa mga establisyemento nga dili mutamod ug tarung, anaa na sa P5,000 ang ipahamtang gikan sa P1,000.
Kahinumduman nga laraw karun sa dakbayan nga bahin-bahinon ug tarung ang mga gipanglabay nga basura aron nga mahunhuran ang nagkadaghan nga pagtapok sa basura sa landfill ning siyudad.
