Nakaandam na ang Cebu City alang sa ipahigayong Grand Opening sa Palarong Pambansa 2024, karong adlawa. Sa pagpanubay sa Bombo Radyo, all set na ang preparation sa maong pag-abli diin ginalauman ang pagdagsa sa katawhan.
Pagasugdan matud pa ang maong aktibidad pinaagi sa parada sa mga atleta bandang alas dos sa hapon, samtang ginalauman sab ang pagtambong ni VP Sara Duterte ug President Bongbong Marcos.
Kabahin niini, adunay giandam nga pasundayag ang lokal nga panggamhanan sa Cebu aron sa paghatag og kalingawan alang sa unang adlaw niini.
Kalakip sab sa ginabantayan karong adlawa mao ang lakat sa panahon human nakasinati og mga pag-ulan kagahapong adlawa.
Hinoon, gipasalig sa LGU nga nakaandam na ang ilang mga personnel alang sa posibilidad nga pag-ulan ug gipaneguro nga dili kini mamahimong babag sa mga dula nga ipahigayon.
Kabahin niini, daghanang mga dabawenyo na usab ang excited sa mamahimong performance sa Davao Eagles diin kahinumdumang niabot sa lugar kaniadtong nakalabayng semana.
Una nang gikanayon sa tigpamaba sa DEPED XI nga si Jenielito ‘Dodong’ Atillo nga paningkamotan sa Davao Eagles nga malabwan ang nasakmit niining ika-unom nga pwesto sa nakalabay nga tuig ug makab-ot ang ika-upat nga pwesto karong tuiga.
