DAVAO CITY – Gumikan sa halos sunod-sunod nga mga pag-ulan nga nasinatian karon sa dakbayan, padayon karon ang panawagan sa City Disaster Risk Reduction and Management Office (Davao CDRRMO) pinaagi sa ilang head nga si Alfredo Baluran nga kinahanglan kanunay alerto ang mga residente ilabi na kadtong nanimuyo sa mga delikado nga lugar aron nga dili mabutang sa risgo ang ilang kinabuhi.
Kahinumduman nga nasinatian sa dakbayan ang mga pag-ulan gumikan sa daut nga panahon sukad pa sa milabay nga semana nga maoy posibleng hinungdan sa mga pagbaha ug pagdahili sa yuta.
Hinuon gipasalig sa nahisgutan nga kanunay nga igmat ang ilang mga personahe ug gipahimangnoan sab nila ang tagsa-tagsa ka mga barangay nga magpatuman gilayon ug preemptive ug force evacuation sa higayon nga mokalit ug saka ang tubig baha sa mga kasapaan.
