DAVAO CITY – Nagpahimangno ang mga hingtungdan nga ahensiya sa kagamhanan partikular na ang City Disaster Risk Reduction and Management Office (CDDRMO) sa mga residente nga nanimuyo daplin sa kasapaan ingon man sa mga landslide prone areas nga kanunay nga mag-igmat sanglit padayon nga makasinate ang dakbayan ug mga pag-ulan.
Kahinumduman nga halos sunod-sunod na nga mga adlaw nakasinate ug pag-ulan ang siyudad hinungdan nga adunay mga kasapaan ang nakasinate ug pagbaha.
Samtang sa nahitabong kusog nga pag-ulan kagabii, adunay insidente sa landslide nga nahitabo sa Brgy. Binaton, Digos City ug adunay pagbaha usab sa Caños River.
Nalisdan ang mga rescuer nga makasulod sa area diin nahitabo ang landslide kini human nga adunay natumba nga punoan sa kahoy sa maong lugar.
Nahubas sab dayon ang tubig sa kasapaan apan padayon kini nga gimonitor sa CDRRMC sa Digos pinaagi sa gimuntar nga mga CCTV camera.
