DAVAO CITY – Giangkon sa opisyal sa Davao City Disaster Risk Reduction and Management Office (CDRRMO) nga dakong hagit karon ang disaster ug calamity preparedness ingon man evacuation sa siyudad samtang gipailalom ang siyudad sa community quarantine gumikan sa coronavirus disease (Covid-19).
Sumala pa kang CDRRMO head Alfredo Baloran, nga pipila ka mga adjustment ang himuon sa ilang buhatan kung hisgutan ang disaster ug calamity response.
Gitataw sab ni Baloran nga karong bulan sa Hulyo, saulogon ang National Disaster Resilience Month diin magpahigayon unta sila ug mga aktibidad kalabot sa disaster preparedness sama sa annual Citywide Shake Out Drill diin masulayan kung paunsa kini himuon karong panahon sa pandemiya.
Sentro sab sumala pa sa ilang aktibidad karong tuiga ang pagsagop sa gitawag karon nga “new normal.”
Gitataw sa opisyal nga angayan sumala pa nga kanunay magbinantayon sa mga natural ug man-made disasters luyo sa nagpadayon nga Covid-19 pandemic.
Gumikan kay magpadayon pa gihapon ang rainy season karong bulan sa Hulyo, laoman pa gihapon ang disasters sama sa pagbaha o pagsaka sa tubig sa mga kasapaan ingon man pagdahili sa yuta.
