DAVAO CITY- Gipasalig sa City Disaster Risk Reduction and Management Office (CDRRMO) ang kaandaman sa matag barangay ning syudad panahon sa kalamidad.
Kahinumduman nga gipahigayon kagahapong adlawa ang City-wide earthquake ug tsunami drill dinhi sa dakbayan diin gipatingog ang mga siren sulod sa tulo ka minuto isip indikasyon sa mandatory evacuation.
Sumala pa ni Lyndon Ancajas, Acting Division Head of Admin and Training Divisison sa CDRRMO, nga gipahugtan nila karon ang monitoring ug pagseguro nga ang matag barangay adunay giandam nga evacuation area uban ang kasayuran sa mga residente kung asa kini padulong panahon sa kalamidad.
Gawas niini, aduna na usab silay gipangmuntar nga signages uban sa pagpakusog sa komunikasyon.
Ning kasamtangan, adunay unom ka mga siren ang gipangmuntar sa buhatan sa coastal areas nga maoy mohatag og pagpahibalo sa mga residente kung gikinahanglan na gayud ang pagpahikling.
Matud pa nga sa maong paagi, maminusan ang mga kadaot ug dili maayong pangitabo ug dakong tabang usab aron maluwas ang kinabuhi sa mga residente.
