Nanawagan ang Catholic Bishops’ Conference of the Philippines (CBCP) kang kanhing Ako Bicol Party-list representative Zaldy Co nga mouli ug magpasa og sinumpaang salaysay kabahin sa iyang gipagawas nga mga alegasyon.
May kalabotan kini sa pagpahayag ni Co nga giingnan matud pa siya ni Pangulong Ferdinand Marcos Jr. nga magsulod og P100 bilyon nga mga proyekto alang sa 2025 national budget.
Sumala sa CBCP, gusto nilang moagi sa hustong proseso ang tanan aron masuta ang kamatuoran, busa importante nga ipaabot ang reklamo sa tukmang hukmanan uban sa gipanumpaan nga pahayag ug lig-on nga ebidensiya.
Dili kuno igo nga ipakatag lamang sa social media ang maong akusasyon; angay kini dad-on sa hustong ahensiya nga adunay katungod sa pag-imbestiga.
Nagpahimangno usab ang CBCP sa bisan kinsang posibleng mopahimulos sa isyu tungod mahimo kini nga makapasamot sa emosyon ug mapulitika pa.
Gipasabot nila nga importante nga ang tanang nalambigit motuman sa tinuoray, matinud-anon ug adunay tulubagon tungod kay katungod sa katawhan ang klarong pagpasabot sa kamatuoran, dili haka-haka; tinuod nga impormasyon, dili tsismis; ug adunay tulubagon ug dili pagpanglimbong.
