Nagpahimangno ang Catholic Bishops’ Conference of the Philippines (CBCP) sa mga nagabaligya nga likayan ang pagpamaligya sulod sa tugkaran sa simbahan human mikatag ang usa ka viral video nga nagpakita sa init nga panaglalis tali sa usa ka pari ug usa ka vendor og palaspas kon lukay sa St. Francis of Assisi Parish sa Cainta, Rizal, niadtong Domingo.
Sumala pa ni CBCP Commission on Public Affairs Executive Secretary Fr.Jerome Secillano, iyaahang gihatag ang “benefit of the doubt” sa pari nga anaa sa video nga daw nasuko sa vendor. Dugang pa niini nga dili angay nga hukman gilayon ang usa ka tawo subay lamang sa usa ka mubo nga clip, ilabi na kung kulang ang konteksto.
Posible sumala pa nga nakaabot na sa maong punto ang pari tungod nagbalik-balik na nga nangutana ug tarong ang pari. Dugang pa niini, aduna sumala pa’y mga tawo nga lisod sabton ug makontrol ang init sa ulo, busa lisod usab magdahom nga magpabilin nga kalmado ang pari sa susama nga sitwasyon.
Sa dihang gipangutana kung angay ba kini imbestigahan, sumala ni Fr. Secillano nga dili na kinahanglan tungod usa ra kini ka-gamay nga insidente nga nakapadako lamang tungod sa pagka-viral niini. Iyahang gibutyag nga dili dayon mosulong ang usa ka pari ug mangatubang og kalit sa mga tawo kon walay hinungdan.
Gipasabot sab ni Secillano nga wala gibalibaran ang pagpamaligya. Gibutyag niini nga gitugotan ang pagpamaligya basta dili lamang sulod sa tugkaran sa simbahan.
