Gipahinumdoman sa Catholic Bishops’ Conference of the Philippines (CBCP) ang mga deboto sa Jesus Nazareno nga moapil sa tinuig nga Traslacion nga ipakita ang disiplina ug pagtahod.
Matod sa Simbahan, importante ang disiplina aron mapakita ang tinuod nga debosyon, ilabi na nga gilauman nga mimilyon ka mga tawo ang motambong pag-usab sa maong kapistahan.
Gidasig usab sa Simbahan ang mga mosalmot sa prusisyon nga magpadayon sa kahinay ug pagpaubos sa kaugalingon, subay sa mensahe sa tema karong tuiga nga “ Dapat Siyang itaas, ako nama’y bumaba’”
Tumong sa CBCP nga ang pagbisita o paglibot sa imahe sa Jesus Nazareno sa nagkalain-laing dapit sa syudad sa Maynila mahimong usa ka higayon aron mapakita nga ang mga Pilipino adunay disiplina sa ilang pagsimba, ug kini makapaduol pa gayod kanila sa Dios.
Nagalaum usab ang Simbahan nga mapakita sa mga motambong ang tinuod nga kahulogan sa pagkahimong deboto sa Nazareno, sama sa debosyon pinaagi sa pag-ampo, sakripisyo, ug paghinulsol.
Ang tinuig nga Traslacion dili lamang ang labing dakong relihiyosong prusisyon sa Pilipinas, kondili giisip usab kini nga usa ka labing dako usab nga prusisyon sa tibuok kalibutan.
