Nagsumite na si Senador Alan Peter Cayetano sa iyang depensa batok sa reklamong obstruction of justice nga nalambigit sa giingong pagbiya ni Senador Ronald “Bato” dela Rosa sa Senado niadtong Mayo 14, sumala sa Office of the Ombudsman.
Sumala pa sa Ombudsman, nadawat na niini niadtong Miyerkules ang counter-affidavit ni Cayetano isip tubag sa reklamo nga gisang-at sa Tindig Pilipinas niadtong Hunyo 3. Matod pa sa anti-graft body, kabahin ang maong kontra-salaysay sa nagpadayon nga preliminary investigation sa reklamo nga gisumite sa mga miyembro sa civil society.
Lakip usab sa mga gireklamo sa maong kaso sila Senador Robin Padilla ug ang kanhi Senate Sergeant-at-Arms Mao Aplasca. Sa kasamtangan, wala pa makapasa og ilang tagsa-tagsa ka kontra-salaysay sila Padilla ug Aplasca, sumala sa Ombudsman.
Dugang pa niini, kung mapakyas ang duha ka respondent sa pagsumite sa ilang depensa sulod sa gitakdang panahon, mahimong ituring nga “deemed submitted for resolution” ang kaso ug dili na modawat ang Ombudsman og dugang dokumento o apela.
