Gikatakdang pasidunggan ang Gymnast sensation nga si Carlos Yulo nga nakamugna og kasaysayan sa naangkong kadaugan niini sa labing unang double-gold medal sa Pilipinas sa Paris Olympics, ug maangkon niini ang ‘Athlete of the Year’ sa Philippine Sportswriters Association (SMC-PSA) karong adlawa, January 27, 2025.
Pagahimuon ang event sa Manila, kung diin isaulog ang mga kalampusan sa nasud sa Olympics ug ang uban pang nag-unang mga atleta sa tuig 2024.
Ang kalampusan ni Yulo ang mihatag usab sa sentenaryo sa pagsalmot sa Pilipinas sa Olimpyada.
Nahilakip usab sa PSA Hall of Fame si Hidilyn Diaz nga four-time winner sa Athlete of the Year kaniadtong 2016, 2018, 2021 ug 2022 sa natad sa weightlifting.
Pagahatagan usab og President’s Award ang boxer nga sila si Nesthy Petecio ug Aira Villegas sa ilahang bronze medals sa Paris Games.
Samtang giila usab si Philippine Olympic Committee (POC) President Abraham ‘Bambol’ Tolentino isip Executive of the Year, ug ang Gymnastics Association of the Philippines ang giila usab isip National Sports Association (NSA) of the Year.
