Nanawagan si Cardinal Pablo Virgilio David, obispo sa Diocese sa Kalookan ug kanhing presidente sa Catholic Bishops’ Conference of the Philippines (CBCP), sa katawhan nga mas labaw nga sabton ug dili dayon hukman ang mga taong nalulong sa online gambling.
Iyang gipasabot nga susama sa kahimtang sa mga drug users sa panahon sa gipatuman nga giyera kontra droga, daghang Pilipino ang naglantaw sa mga addict isip mga salot sa katilingban, nga nagmugna og mas dakong stigma.
Matud niya, susama sa ubang mga bisyo, posible nga aduna sab silay mga personal nga rason o kalisdanan nga nagdasig sa ilang pagkaadik sa online sugal.
Ang uban niini, sumala pa ni Cardinal David, posibleng nakasinati og emosyonal, pinansyal o mental nga problema, nga nanginahanglan og pagsabot ug tabang imbes nga pagpanaway.
Gipahinumduman usab niya ang katawhan nga mas maayo nga tan-awon ang ugat sa problema kaysa dali-dalion og paghukom ang mga nalambigit niini.
Sa mga miaging pahayag, nanawagan si Cardinal David sa gobyerno nga hatagan og prayoridad ang pagsumpo sa nagakatag nga online gambling platforms, tungod kay daghang pamilya na ang naguba tungod niini.
