Tingkagol sa bilangguan ang usa ka Coconut vendor kon Buko Vendor human nga nanigbas sumala pa sa usa ka car wash boy pasado alas Nuybi kagabii.
Subay sa report gikan sa Bajada PNP, giila ang suspetsado nga si alyas “Jojo” hamtong ang panuigon, lumad nga taga Malita, Davao Occidental.
Samtang ang biktima giila nga si Frankie, 34-anyos. lumad nga taga Brgy. Tuban, Sta. Cruz, Davao Del Sur.
Subay sa gihimong imbistigasyon sa mga kapulisan, nahitabo ang pagpanigbas sa New Burgos St., Cor. Nicasio Torres St., Barangay 20-B, Obrero, siyudad sa Davao.
Sumala pa sa mga nakasaksi sa maong panghitabo, nagkalalis ang duha tungod sumala pa sa pwesto sa negosyo hinungdan nga miresulta sa pagpanigbas.
Nakaangkon og samad tinigbasan ang biktima nga padayon karon nga giatiman sa mga doktor sa Southern Philippines Medical Center kon SPMC.
Samtang ang suspek ang gikatakda kini nga pasakahan og kaso nga frustrated homicide.
