Gikatakda sa Setyembre 7 ang canonization sa giilang unang millennial saint nga si Carlo Acutis.
Gipahibalo kini ni Pope Leo XIV, ug kini ang una niining canonization sukad sa iyang paglingkod isip Santo Papa.
Nasayran nga giplano na unta nga buhaton ang canonization niadtong Abril 27, apan kini napospon tungod sa pagpanaw ni Pope Francis.
Namatay si Acutis sa edad nga 15 didto sa Northern Italy niadtong 2006 tungod sa leukemia. Sa iyang kinabuhi, hilig kini og hiking, dula og video games, ug pagbonding uban sa iyang mga higala.
Nagtudlo usab siya og katekismo sa lokal nga parokya ug mitabang sa mga walay kapuy-an.
Tungod sa iyang kahanas sa computer, nakamugna siya og online exhibit kabahin sa kapin 100 ka eucharistic miracles nga giila sa simbahan sulod sa daghang siglo.
Nahimong pilgrimage site ang iyang lubnganan niadtong 2025, diin makita kini sulod sa usa ka salamin nga lungon, nga nagsul-ob lamang siya og “maong” nga pantalon, sweatshirt, ug sneakers nga daw natulog lamang.
Makig-uban usab sa canonization ni Acutis si Italian Catholic Pier Giorgio Frassati, nga namatay sa edad nga 24 tungod sa polio.
