Miatras na ang Cambodia sa 2025 Southeast Asian Games tungod sa mga rason kabahin sa kaluwasan.
Sa sulat nga gipadala sa National Olympic Committee of Cambodia (NOCC) ug pirmado ni Secretary General Vath Chamroeun, nakabutang nga prayoridad ang kaluwasan sa mga delegado, mao nga gipabalik sa ilang nasud ang mga atleta sa Cambodia nga unta mosalmot kini sa lain-laing sporting event sa Thailand.
Ang sulat adunay petsa nga Disyembre 10, usa ka adlaw human sa opisyal nga pagsugod sa SEAG 2025.
Gibutyag usab sa sulat nga daghan sa mga atleta ug ilahang pamilya ang nihangyo nga mobalik dayon sa ilang nasud human mitumaw ang armadong panagbangi tali sa duha ka nasud.
Dali usab nga giandam sa NOCC ang luwas nga pagbalik sa tibuok delegasyon.
Bisan pa niini, nagpasalamat gihapon ang komite sa mainiton nga pagdawat sa National Olympic Committee of Thailand (NOCT) ug sa SEAG organizing committee ngadto sa mga atleta sa Cambodia.
Walay sayon nga desisyon ang paghimo niini, apan gibutyag sa NOCC nga kinahanglan kini aron maprotektahan ang kaluwasan sa mga partisipante.
Kung tan-awon ang naunang panagbangi tali sa mga awtoridad sa Cambodia ug Thailand, miabot sa 11 ka mga sundalo ug sibilyan na ang namatay sa duha ka nasud.
