Gilimod sa Malacañang nga adunay gikatakdang pag-ilis kon (cabinet revamp) sa gabinete ni Pangulong Ferdinand Marcos Jr.
Matod ni Palace Press Officer Usec. Claire Castro, wala kuno’y gihisgutan sa Malacañang nga bisan unsang bag-ong revamp sa gabinete.
Sa karon, sumala pa niya, wala siyay nadawat nga impormasyon kabahin sa bisan unsang kausaban sa mga miyembro sa gabinete.
Dugang pa sa opisyal sa Palasyo, posible nga tsismis lamang ang gipakalat kabahin sa giingong cabinet revamp.
Bisan pa niini, gikompirma niya nga nagpadayon ang performance review sa mga opisyal sa gobyerno.
Sumala pa ni Castro, magdepende gihapon sa desisyon sa Pangulo kung kontento ba kini sa trabaho sa iyang gabinete.
Una niini, mitumaw na usab ang balita kabahin sa giingong “rigodon,” diin siyam ka ahensya ang gituohang posibleng maapektuhan, lakip na ang Department of Health (DOH), Department of Tourism (DOT), Department of Transportation (DOTr), Department of Foreign Affairs (DFA), Bureau of Customs (BOC), Department of Education (DepEd), Department of Public Works and Highways (DPWH), Department of Information and Communications Technology (DICT), ug Department of Economy, Planning and Development (DepDev).
