Nakiglambigit na ang Civil Aviation Authority of the Philippines (CAAP) sa ilahang counterpart nga ahensya sa Malaysia ug Singapore aron bantayan ang tulo ka rehistradong air assets nga konektado sa miluwat nga kanhing Ako Bicol Rep. Zaldy Co.
Kini gipahayag ni CAAP Director General Raul del Rosario human sa pahibalo sa ahensya kagahapon nga anaa sa Kota Kinabalu, Malaysia ang duha ka AgustaWestland helicopters nga nalambigit kang Co, nga milupad sa maong lugar niadtong Agosto 20 ug Septyembre 11. Samtang ang Gulfstream aircraft ang anaa sa Singapore sukad pa niadtong Agosto 16.
Gawas sa maong tulo ka air assets ni Co, gibantayan usab sa CAAP ang napulo pa ka lain-laing mga sakyanan pangkawanangan aron nga anaa gihapon sa nasud.
Kahinumduman nga niadtong miaging bulan, gipadayag ni DPWH Secretary Vince Dizon nga naharang sa CAAP ang tinguha sa mga kompaniya nga konektado kang Co nga i-deregister ang tulo ka chopper nga gipahimangnoan nga i-freeze sa DPWH.
