Nagpasidaan si Senate President Pro Tempore Panfilo “Ping” Lacson nga mahimong malangan o maalanganin ang Commission on Appointments (CA) kon usbon niini ang opisyal nga rekord sa pagdungog niadtong Pebrero 4, nga naglangkob sa kontrobersyal nga pahayag ni Senator Rodante Marcoleta mahitungod sa giingong pagtahan sa Kalayaan Island Group sa Palawan.
Matod ni Senador Lacson, mahimong masakop sa kaso nga falsification of legislative documents ang maong lakang kon usbon ang opisyal nga napatik sa pagdungog.
Adunay kaubang silot kini ubos sa Revised Penal Code of the Philippines, ilabina sa Article 170, batok sa bisan kinsa nga mag-usab sa mga dokumentong lehislatibo nga walay igo nga awtoridad.
Gipasabot sa senador nga ubos sa Article 170, mahimong silotan og prisión correccional hangtod sa maximum period ug multang moabot sa P1.2 milyon ang bisan kinsa nga mag-usab sa usa ka sugyot nga balaod, resolusyon, o mga ordinansang napasar, bisan pa sa Kongreso o sa lokal nga konseho.
Sa pagkakaron, naghulat pa sa resolusyon ang mosyon ni Marcoleta nga usbon ang pipila ka bahin sa rekord sa pagdungog, ug kini gipadala na sa Committee on Rules sa Commission on Appointments alang sa pagrepaso.
Samtang, gipadayag usab ni Lacson ang iyang kabalaka kang Senate President Vicente “Tito” Sotto III, nga maoy chairman sa Commission on Appointments.
