Nagpahimangno ang grupo sa mga truckers sa nasud nga posibleng magminus sila sa ilahang biyahe tungod sa padayon nga pagsaka sa presyo sa mga produktong petrolyo.
Sumala kang Rina Papa, bise presidente sa Alliance of Concerned Truck Owners and Organizations, nangayo na ang mga truckers og 30 porsyento nga pagsaka sa delivery rates sukad pa sa unang semana sa Marso.
Dugang pa niya nga bisan og aprobahan kini sa ilahang mga kliyente, naga-antus gihapon sila og kalugi nga mokabat sa 20 porsyento sa ilahang kita.
Tungod niini, mapugos sila sa pagkunhod sa ilahang mga biyahe, ilabina kay ang halos tanan nilang kita mapadulong na lamang sa gasto sa krudo.
Gipasabot usab niini nga wala silay plano nga maglusad og transport holiday, tungod kay ang trucking usa sa mga sektor nga gitugotan nga magpadayon sa operasyon panahon sa pandemya.
Apan kung matuman ang ilahang plano nga pagminus sa biyahe, posibleng maapektuhan ang daghang negosyo nga gikan sa gagmay hangtod sa dagkong mga negosyante tungod sa posibleng pagka-delatar sa delivery sa mga produkto.
