Misulod sa kadagatan sa Panabo City ang usa ka dako nga whale shark o mas nailhan nga butanding, nga nasaksihan ug nakuhaan og hulagway sa mga sakop sa Bantay Dagat didto sa Panabo Mariculture Park sa JP Laurel area, Davao del Norte.
Sumala sa City Agriculturist Office, namatikdan ang presensya sa butanding atol sa ilang scheduled feeding sa cultured milkfish o bangus sulod sa mga fish cage sa maong lugar. Kalma lang ang lihok sa dakong isda samtang naglibot sa palibot sa mariculture site, nga wala magpakita og agresibong pamatasan.
Matod pa sa mga personnel nga naka-saksi sa insidente, kadiyot lang nagpabilin ang butanding sa area sa dili pa kini mipadayon sa paglangoy paingon sa mas lawom nga bahin sa dagat. Ang maong talan-awon nakapukaw og interes ug kahibulong sa mga nagbantay sa mariculture park, ilabi na kay panagsa ra kini makita duol sa coastal area.
Gipasabot sa City Agriculturist Office nga natural lang nga moanha ang butanding sa maong lugar tungod kay gagmayng organismo ang kasagaran nga pagkaon niini, nga posibleng madani sa feeding activity sa mga fish cage.
Gipahinumdom usab sa lokal nga kagamhanan ug mga marine experts nga ang butanding usa ka protected species, busa gikinahanglan ang hustong distansya ug paglikay sa bisan unsang kalihokan nga makasamok niini. Wala gitugotan ang pagduol, paglangoy tapad, o pagkuha og kahigayunan nga makadaut sa maong hayop.
Giila sa city officials ang maong panghitabo isip timailhan sa maayong kahimtangan sa kadagatan sa Panabo, ug nag-awhag sa publiko nga magpadayon sa pagpanalipod sa marine life aron mas daghan pang talagsaong espesye ang magpabilin ug mobalik sa lokal nga baybayon.
