Nag-atubang sa reklamong graft si Bureau of Customs chief Ariel Nepomuceno ug Bureau of Plant Industry (BPI) Director Gerald Glenn Panganiban ug uban pang opisyal sa duha ka ahensya.
Kini gumikan sa gipasakang reklamo sa Office of the Ombudsman sa grupo sa mga mag-uuma nga adunay kalabutan sa 60 ka adlaw nga suspensyon sa importasyon sa regular milled ug well-milled rice.
Subay sa reklamo nga gipermahan ni Federation of Free Farmers (FFF) National Manager Raul Montemayor ug MAGSASAKA Chairperson Argel Joseph Cabatbat, gisupak kuno sa nahisgutang mga opisyal ang probisyon ubos sa Anti-Graft and Corrupt Practices Act, nakamugna ug grave misconduct, gross neglect of duty ug conduct prejudicial to the best interest of the service against the respondents.
Matod pa sa reklamo, gitugutan pa gihapong makasulod sa nasud ang rice shipments nga mosobra sa 340,000 tonelada bisan paman mipatigbabaw ang 60-day suspension, kung diin 90% sa mga nahisgutan ang regular ug well-milled rice grades nga nahilakip sa ban.
Nahimong dalan usab niini ang gi-isyung BPI Memorandum ug clearance of shipments sa BOC.
