Hugtanong gikondena sa Malacañang ang mga natala nga insidente sa bullying sa mga tunghaan. Gipasalig sa Palasyo ang paspas nga aksyon sa gobyerno aron masulbad ang bag-o nga mga insidente sa kapintasan ug bullying sa mga eskwelahan, diin pipila ka mga estudyante ang nalambigit.
Matod ni Palace Press Officer Claire Castro, nga nasayod ang palasyo sa mga panghitabo nga sama niini, busa miadto dayon ang mga social worker sa Department of Social Welfare and Development (DSWD) sa mga tunghaan nga nalambigit, aron imbestigahon ug mahatagan sa gikinahanglang ayuda ang mga tinun-an.
Imbistigahan usab sa Department of Education ang nahitabong bullying ug nakighinabi na sa mga principal sa mga tunghaan nga nalambigit aron masayran ang tibuok detalye.
Lakip sa natala nga kapintasan sa mga tunghaan mao ang kamatayon sa duha ka mga estudyante sa senior high school sa Las Piñas human gidunggab sa kaubang estudyante, ingon man ang pagdunggab sa usa ka lalaki nga tinun-an ngadto sa usa ka babaye nga classmate sa Parañaque ug ang viral video sa usa ka estudyante nga gikulata sa iyang mga classmate.
