Nagpakita og gamay nga pagbuto ang Bulkang Kanlaon karon lamang gabii sa La Castellana, Negros Occidental.
Subay sa gipagawas nga impormasyon sa Philippine Institute of Volcanology and Seismology(PHIVOLCS) nga nahitabo ang pagbuga og abo gikan alas 8:05 hangtod sa alas 8:08 sa gabii.
Sumala sa PHIVOLCS, ang abo o eruption plume mibuga ngadto sa 2,000 metros nga kahabog gikan sa crater sa bulkan ug mikaylap padulong sa amihanang-sidlakan (northeast).
Subay usab sa footage, nagpakita og pyroclastic density currents (PDCs) nga midagayday paubos sa habagatan nga bahin sa bulkan, sulod sa Usa ka kilometro nga radius.
Sa pagkakaron, nagpabilin pa gihapon ang Alert Level 2 sa Bulkang Kanlaon, nga nagpasabot sa mas taas nga kalihukan sa bulkan ug posibilidad sa dugang nga eksplosibong mga pagbuto kon phreatic eruptions.
Samtang sa usa ka video makita ang pag-ulan ug abo sa Purok Kakapihan 1, Barangay Mailum human sa maong panghitabo.
Padayon usab nga nagpasidaan ang PHIVOLCS sa mga residente nga duol sa bulkan nga magpuyo lamang sa sulod sa ilahang mga balay tungod sa posibleng peligro sa panglawas nga dala sa pag-ulan og abo, ug magpabiling magbantay sa mga opisyal nga pahibalo.
