Nunot sa direktiba ni Presidente Ferdinand R. Marcos Jr., gibag-o sa Department of Public Works and Highways (DPWH) ang sugyot nga budget sa 2026, nga miresulta sa ‘substantial reduction’ sa flood control projects.
Sa press briefing sa Malacañang, gikumpirma ni Presidential Communications Office Undersecretary ug Palace Press Officer Claire Castro nga ang inisyal nga budget sa DPWH nga nagkantidad og P881.3 bilyones gikunhoran ug halos 30%.
Namatikdan ni Castro nga ang proposed budget alang sa 2026 gi-adjust ngadto sa P625.8 billion human sa pagtangtang sa P252 billion sa locally funded flood control projects nga nasuta nga dili regular.
Si Castro midugang nga ang DPWH mihangyo sa Kongreso nga i-reallocate ang P252 bilyones sa mga programa ug proyekto nga direktang makabenepisyo sa katawhan, partikular na sa natad sa agrikultura, edukasyon, healthcare, pabalay, labor, social welfare, ug information technology.
Gisubli ni Castro nga gipasiugda sa administrasyon ang pagkamay-tulubagon batok sa mga nalambigit sa mga anomalosong proyekto sa pagpugong sa baha.
