Gipagawas na sa Department of Budget and Management (DBM) ang P3.627 bilyon nga pondo alang sa elektripikasyon sa mga rural nga lugar.
Kini uyon sa tumong ni Presidente Ferdinand Marcos Jr. nga makab-ot ang total electrification sa tibuok nasud sa wala pa matapos ang iyahang termino sa 2028.
Sa usa ka pamahayag, giingon sa DBM nga giaprobahan na ni Budget Secretary Amenah Pangandaman ang Special Allotment Release Order (SARO) para sa 2025 Strategized Rural Electrification and Operational Reliability for Electric Cooperatives nga ipatuman sa National Electrification Administration (NEA).
Gisakop sa maong pondo ang pagbutang og kuryente sa 1,752 ka mga sitio ug lima ka barangay ubos sa 2025 subsidy.
Dugang nga P68.839 milyon usab ang gigahin alang sa rehabilitasyon sa lima ka mga barangay nga kaniadto gisilbihan sa off-grid solutions pinaagi sa Barangay Line Enhancement Program.
Gawas pa niini, kinatibuk-ang P120 milyon ang gamiton alang sa pagpalit ug pag-apod-apod sa 4,000 ka mga unit sa Solar Photovoltaic Mainstreaming aron matagaan og kuryente ang mga komunidad nga walay access sa suplay sa kuryente.
Sumala pa sa DBM, aduna pa’y 9,622 ka target nga mga sitio nga wala pa’y kuryente ug giplanohan nga pondohan sa gobyerno hangtod sa tuig 2028.
