Gipahimangnoan sa Bangko Sentral ng Pilipinas (BSP) nga ang ginapatuman nga enhanced due diligence (EDD) sa mga cash withdrawal nga molapas og P500,000 ang per customer na ug dili per transaction.
Sumala sa memorandum nga gipagawas ni BSP Governor Eli Remolona Jr., ang maong klaripikasyon gituyo aron masiguro nga walay paglangan sa mga lehitimong transaksyon.
Gipangayuan usab sa BSP ang mga bangko nga maminusan ang mga proseso alang sa mga kustomer ug tudluan ang ilahang mga kawani aron mahimong epektibo ang pagpatuman sa maong mando.
Ang maong patakaran gisugdan niadtong miaging tuig alang sa over-the-counter withdrawals nga molapas og tunga sa milyon nga kantidad aron malikayan ang money laundering nga nalambigit sa dagkong withdrawals.
Ang mga kustomer nga gustong mag-withdraw og kapin sa tunga sa milyon ang kinahanglan nga magpakita og mga dokumento sama sa deed of sale o hospital bill.
Mas hugot ang due diligence check kon adunay kadudahan nga transaksyon ang mga kustomer.
