Nagpahimangno si British Prime Minister Keir Starmer nga ilahang ilhon ang Palestine isip usa ka nasud sa Setyembre kung dili buhaton sa Israel ang mga lakang aron tapuson ang krisis sa Gaza lakip na ang paghunong sa giyera, pagpasa sa humanitarian aid, ug paglikay sa pag-angkon sa West Bank.
Ang maong pahimangno gisundan sa report gikan sa Integrated Food Security Phase Classification (IPC) nga nagkanayon nga ang kahimtang sa Gaza miabot na sa lebel sa kagutom, ug nagkataas ang ihap sa mga namatay tungod sa gutom ug malnutrisyon, lakip na ang 88 ka mga bata.
Gikondena usab kini ni Israeli Prime Minister Benjamin Netanyahu, nga nagbutyag nga ang pag-ila sa Palestine usa lamang ka ganti sa terorismo nga ginabuhat sa Hamas.
Samtang, gipahayag ni US President Donald Trump nga dili siya pabor sa paghatag og ganti sa Hamas, apan wala usab siya misupak sa desisyon sa Britain.
Gidayeg ni Palestinian President Mahmoud Abbas ang gihimo ni Starmer ug gitawag kini nga usaka maisug nga lakang.
Kon mapadayon, kini kuno nga pag-ila ang mahimong kasaysayan alang sa katawhang Palestino.
Bisan paman niini, nagkakusog ang panawagan sa ubang mga nasud nga pasudlon na sa Israel ang sunod-sunod nga humanitarian aid ngadto sa Gaza, samtang padayon ang pagtaas sa ihap sa mga sibilyang nangamatay tungod sa kagutom.
