Gipasidaan ni Brazilian President Luiz Inacio Lula da Silva nga dili na angay magpakabuta-bungol ang kalibutan sa giila niya nga “genocide” o pagpamatay sa mga inosente nga sibilyan sa Gaza nga gihimo sa Israel.
Gibutyag ni Lula ang maong pahayag sa mitipon nga mga lider sa 11 ka nasud nga sakop sa BRICS group, lakip ang Brazil, Russia, India, China ug uban pa, niadtong Domingo sa Rio de Janeiro.
Matod ni Lula, kinahanglan mohimo og aksyon ang internasyonal nga komunidad aron mapugngan ang padayon nga kagubot sa Gaza, diin giakusahan niya ang Israel sa pagpatay sa mga sibilyan ug paggamit sa kagutom isip armas sa gubat.
Samtang nagpadayon ang negosasyon alang sa posibleng ceasefire tali sa Israel ug Hamas, gibalik ni Lula ang iyang panawagan sa kalibutan nga suportahan ang mga lakang aron matapos na ang 22 ka buwan nga kagubot nga gisugdan sa pag-atake sa Hamas kaniadtong Oktubre 7, 2023.
Gilatid usab sa Brazilian president ang iyang pagkontra sa gihimong teroristang lihok sa Hamas nga hinungdan sa kamatayon sa kapin 1,200 ka tawo, kasagaran mga sibilyan sa Israel.
Apan, gihulagway ni Lula nga sobra ug dili makatao ang gisukli nga mga lihok sa Israel batok sa Gaza. Mga nasud na miyembro sa BRICS nga nitambong sa summit mao ang Iran, nga nailang kaaway sa Israel, ug Russia, nga dunay diplomatikong relasyon sa Israel.
