DAVAO CITY – (Update) Plano karon sa independent network sa mga empleyado nga nanarbaho sa business process outsourcing companies nga magpahigayon ug kaugalingon nga imbestigasyon kalabot sa nahitabong sunog sa NCCC Mall nga mikalas ug kapin 30 ka mga kinabuhi diin sagad niini mga call center agents.
Una ng nagtapok ang BPO Industry Employees Network (BIEN), kaabag ang progresibong grupo ning siyudad atubangan sa Mall diin ilang gipahigayon ang misa ug candle lighting activity.
Matud pa kang Jupiter Delgra, BIEN public relations officer, nga buot pa gihapon nila nga mohimo ug kaugalingon nga imbestigasyon luyo sa nahimong resulta nga gipagula sa otoridad aron madetermina kung si kinsa ang angayan nga manubag sa kamatayon sa mga biktima.
Nagpasibaw sab sila ug kadismaya sa non-compliance sa mga kompanya sa safety standards nga gimando sa kagamhanan sa pagtukod ug mga gambalay.
Samtang gisaway sab sa Kilusang Mayo Uno Southern Mindanao Region ang Department of Labor and Employment (DOLE) gumikan kay mi-isyu sumala pa kini ug permit sa RN SSI ug NCCC pinaagi lamang sa self-assessment o mosumite lamang ang mga employers ug mga gikinahanglan nga dokumento diin mamahimo lamang nila nga ibutyag nga mogana ang ilang emergency alarms ug mga fire distinguishers bisan nga walay igong inspeksiyon.
