Gikabutyag nga mitala ug world record ang usa ka botelya sa ilimnong makahubog nga cognac gumikan kay nagagikan pa kini sa panahon nila ni King Louis XIV sa France ug King William III sa England.
Gikumperma sa Guinness World Records nga ang botelya sa 1696 Jules Robin Cognac ang pinakabag-o nga adunay gihuptang titulo nga “World’s Oldest Cognac”.
Kini gumikan kay gimugna pa kini kaniadtong 1696 ug adunay edad na kini nga 328 years old.
Ang nahisgutang ilimnon ang ipanag-iyahan sa kolektor nga si Lars Janssen sa Netherlands.
Ang Cognac ang usa ka matang sa brandy nga ginama gikan sa ubas ug partikular kini nagagikan sa rehiyon sa Cognac, France, hinungdan gitawag kini nga Cognac.
Adunay hugot nga mga regulasyon ang gisunod sa pagmugna ug Cognac, lakip na ang partikular nga matang sa ubas, distillation process nga gikinahanglang himuon duha kahigayon sa copper pot stills ug ang pagtigulang niini sa oak barrels nga dili mo-ubos sa duha katuig.
