DAVAO CITY – Doble ang pagpaningkamut karon sa lokal nga kagamhanan pinaagi sa Vaccination Cluster alang sa vaccination campaign aron masiguro ang booster vaccination rollout sa mga pribadong establisyemento sama sa Business Process Outsourcing (BPOs), restaurants, ug mga banko sa dakbayan.
Sumala pa kang Dr. Michelle Schlosser, tigpamaba sa Davao City Covid-19 Task Force, nakighinabi na sila sa nahisgutan nga mga establisyemento arun nga makapahigayon ug booster shot sa mga empleyado apan himuon sumala pa kini pinaagi sa sectoral approach.
Gitataw sab ni Schlosser nga gawas sa booster doses mamahimo sab sila nga makapahigayon ug pagbakuna alang sa 1st ug 2nd dose dungan sa pagbisita.
Una niini, nagpasalamat si Schlosser sa uban nga sector nga nagatabang kanila arun nga mabakunahan ang ilang mga trabahante ilabi na ang mga security personnel, PNP, ug magtutudlo.
]Bisan nga wala pa naka-100 percent apan padayon sumala pa nga nagasaka ang ihap sa mga empleyado nga ilang nabakunahan.
Nasayran nga sa milabay nga Marso 13, 2022 kinatibuk-ang 221,855 ka mga indibidwal na ang nakapa-booster shots diin mas layo kini sa ihap sa mga fully vaccinated nga anaa sa 1,286,260 o 85 percent.
