DAVAO CITY – Malampuson nga napahigayon ang bomb drill sa dakbayan sa Davao nga gipahigayon sa Bankerohan Public market, ning dakbayan nga giisip nga mind conditioning.
Kini ang gihatagan ug katin-wan ni Public Safety and Security Command Cented (PSSCC) deputy chief Angel Sumagaysay, kinsa namahayag nga ang nahisgutan nga kalihukan mao ang mopakondisyon sa panghuna-huna sa katawhan.
Kaganina nahimong barado ang dagan sa mga sakyanan pasulod ug paggawas sa dakbayan samtang gipatuman ang seguridad atol sa gipahigayon nga bomb drill.
Apektado sab niini mao ang biyahe sa mga sakyanan agi sa Quirino Avenue ug Mac Arthur Highway, labi na sa mga sakyanan nga pasulod sa dakbayan.
Sumala pa kang Sumagaysay angayan nga magpakabana ang mga taga-Davao aron nga kung mahitabo man kini duna na’y mamahimong nga adjustment ang katawhan ug dili mosamot ang suliran gumikan sa nangatarantar nga katawhan.
Dili na bag-o ang mga pagpamomba sa dakbayan gumikan kay nahitabo na kini sa Davao Airport, Sasa Wharf, ug ang pinakaulahi ang natigayon sa Roxas Night Market nga managsama nga nakakalas ug daghanan nga kinabuhi ug mi-angol sa ubay-ubay nga mga biktima.
