Gikumpirma sa management sa Gmall Davao nga adunay nahitabo nga gamay nga sunog sa ikatulong andana kagahapon sa hapon.
Subay sa ilahang gipaguwa nga pamahayag,nahitabo ang sunog sa Gaisano store diin gilayon usab kini nga girespondehan sa ilahang emergency response team kauban ang Bureau of Fire Protection ug volunteer fire fighters.
Giklaro usab niini nga walay naangol atol sa maong panghitabo nga gideklara gilayon sa BFP nga fire-out pipila ka minutos lamang ang nakalabay.
Samtang gikanayon sa nasampit nga mall nga pabilin sila nga abri atol sa maong panghitabo ingon man ang parking area ug abri usab karong adlawa.
Kahinumduman nga naalarma ang mga katawhan nga naa sa sulod sa maong mall og dali kining nanggawas human sa nahitabong sunog.
Nasayran nga niabot pa sa unang alarma ang sunog nga nahitabo pasado alas Sais kagabii.
Subay sa nisyal nga imbestigasyon ni SFO1 Genesis Sitcharon, imbestigador sa Bajada Fire Station nga ang hinungdan sa sunog mahitungod kini sa nag-overheat nga flourescent nga suga nga anaa sa bodega nga bahin.
Tungod niini padayon karon nga nagpahimangno ang otoridad sa publiko nga magpabiling magbinantayon ilabi na sa mga establisemento nga nagpunsisok ang mga tawo.
