DAVAO CITY – Laraw karon sa pamunoan sa Bureau of Jail Management and Penology (BJMP)-11 nga ipatuman ang non-contact visitation sa mga peneriso kini human nga wala na kini personal nga nakita sa ilang kabanay sukad nga nagsugod ang outbreak sa covid-19 dinhi sa dakbayan.
Sumala sa pamunoan sa BJMP, kinahanglan lamang nga motamud sa gikinahanglan nga guidelines aron nga pabilin nga luwas batok sa kagaw.
Una ng gibutyag ni Jail Capt. Edo Lobenia, tigpamaba sa BJMP-11 nga kinahanglan fully vaccinated na ang usa ka bisita, ginadili ang pagdala ug bata ug kinahanglan magpa-schedule una ayha mobisita sa pasilidad.
Kahinumduman nga ubay-ubay ka mga peneriso ug personahe sa BJMP-11 ang una ng natakdan ug covid-19 nga maoy hinungdan nga gipatuman ang lockdown sa pipila ka mga presohan aron nga mapugngan ang pagsaka sa kaso sulod sa pasilidad sukad nga nagsugod ang outbreak niini.
Kini sab ang nahimong hinungdan nga gipatuman na lamang ang e-dalaw o pakighinabi sa mga peneriso sa ilang mga kabanay gamit ang internet kini aron nga dili ma-expose ang mga nahisgutan sa mga tawo nga gikan sa gawas ug posibleng nagdala ug covid-19.
