DAVAO CITY – Subling nagpahimangno ang buhatan sa Bureau of Internal Revenue kon BIR Revenue District Office 113A Davao City nga dili makigtransaksyon sa mga nagahatag kuno og assistance aron makakuha og Taxpayer Identification Number (TIN) Card.
Gikanayon ni 113A West Davao City Revenue Officer 1 Wilma Villarte, nga bugtong sa BIR offices lang makuha ang mga TIN card.
Matud niya, dili lehitimong TIN ang nakabutang sa card nga nakuha gawas sa buhatan.
Personal nga pag-adto usab sa buhatan ang bugtong pamaagi aron makuha kini.
Gipaklaro usab ni Villarte nga kadtong locally-employed, self-employed, o professional individuals lang ang makakuha og TIN card.
Apan, mamahimong makahatag og Taxpayer Identification Number ang buhatan ngadto sa mga empleyado nga wala nalakip sa maong listahan.
Nanawagan si Villarte ngadto sa mga Dabawenyo nga i-report gilayon sa ilang buhatan ug sa mga otoridad, o di ka magpadala og mensahe sa ilang Facebook page nga BIR RDO 113A-West Davao City, kung aduna silay impormasyon kalabot sa mga nagapamaligya ug nagapameke sa mga TIN Card.
