DAVAO CITY – Patay nang nahi-abot sa Davao Medical School Foundation (DMSF) ang singkwenta anyos nga usa ka Eduardo Ty, nga biktima sa pagpamusil kaganinang alas 5:00 sa buntag sa wala pa maila nga mamumuno sa gawas mismo sa iyang balay sa Jade Valley Subdivision, Buhangin, ning dakbayan.
Sakay na sa iyang sakyanan ug mogikan na unta ang biktima dihang giulo pagpusil sa armado makadaghang higayon.
Na-recover sa crime scene ang upat ka mga baseyo sa bala sa .45 kalibre nga armas.
Ang live-in partner sa biktima nga usa ka Diane Matias ang nagbutyag nga mipaubos ang biktima sa community based drug rehabilitation ug naga-report sa Barangay Tigato alang sa nahisgutan nga programa.
Dugay na sumala pa nga nahilambigit sa illegal nga druga ang biktima niadto pang 2015 ug gika-ingong nagbag-o na.
Ginasuta pa sa Buhangin Police Station kung duna pa’y laing rason ngano nga gipusil patay ang biktima.
Sumala sa livein nga wala maghisgot ang iyang kaipon nga dunay nag-interes sa iyang kinabuhi ug wala sab sumala pa kini’y nahimong kaaway.
Gipanghimakak sab niini nga love triangle ang hinongdan sa pagkapusil sa iyang kaipon.
Nasayran nga ang biktima dunay unang pamilya nga anaa na karon sa gawas sa nasod gumikan kay mayo na sumala pa ang relasyon niini sa unang asawa sa iyang kaipon.
