DAVAO CITY- Gidapit karon sa bag-ong administrasyon sa panggamhanang lokal sa Tagum City, Davao del Norte ang mga nabiktima kaniadto sa investment scams sa ilang syudad nga musang-at og kaso dungan sa panaad nga hatagan nila kini og legal assistance.
Partikular nga gi-awhag sa City Government of Tagum kadtong mga indibidwal nga naka pay-in kaniadtong nakalabay nga tuig.
Mamahimo matud pa nga moduol ang mga nahisgutan sa City Mayor’s Office aron nga makapasaka og kaso.
Kahinumduman nga niadtong nakalabay nga mga tuig, usa ang Tagum City sa mga syudad diin daghan ang nabiktima sa naghitak usab nga mga investment scam diin nagtanyag og mga “too good to be true” nga mga investment returns.
Gawas niini, lakip sab sa panawagan sa panggamhanan sa Tagum ang pagsumbong sa mga empleyado niini nga nalambigit sab sa maong investment scheme aron nga mahatagan kini og tukmang lakang.
Nanghinaut na lamang ang panggamhanan nga makig-alayon ang mga biktima aron maangkon ang hustisya ingon man masilotan ang mga mapahimuslanon ug mangingilad nga grupo nga maoy mipaluyo sa mga investment companies.
BY BOMBO ALLIANE SILAO
