Nahuman na ang bicameral conference committee meeting alang sa pinal nga bersyon sa 2026 national budget.
Milapas na sa alas 2:20 kagainang kaadlawon sa dihang gitapos sa Senado ug House of Representatives ang ilahang pagtuki sa pipila ka mga amendment sa 2026 General Appropriations Bill.
Miabot og unom ka adlaw ang bicameral conference nga nagsugod niadtong Disyembre 13 hangtod 18.
Gipangulohan ang maong miting nila Senate Finance Committee Chairperson Sherwin Gatchalian ug House Appropriations Chairperson Mikaela Suansing.
Karong tuiga, makasaysayanon ang maong proseso tungod kasagaran closed-door ginahimo ang bicameral conference sa budget, apan sa unang higayon karon, kini gi-livestream.
Ang ₱6.793 trilyon nga 2026 General Appropriations Bill gikatakdang ipasa kang Pangulong Ferdinand Marcos Jr. aron kini iyang aprobahan.
