Nagpasidaan ang Bureau of Immigration (BI) sa publiko ilabi na sa mga young professionals sa ginahimo nga massive recruitment sa pipila ka sindikato nga mitanyag ug trabaho sa abroad isip mga customer service, apan paghiabot sa ubang kanasuran nahimo nga biktima kini sa scam hubs.
Gipahayag ni BI Spokesperson Dana Sandoval, nga ang na-recruit nga mga Filipino ang magtrabaho sa mga Pogo like operations sa ubang kanasuran.
Gipahayag pa niini nga mokabat na sa 118 ka mga filipino ang ilahang nababagan sa nagkadaiyang airport sa nasud nga na-recruit aron magtrabaho sa abroad.
Miuyon usab ang nahisgutang opisyal nga bisan paman sa mga balita nga adunay kalabutan sa POGO, adunay mga tawo pa gihapon ang nadani nga magtrabaho gumikan sa maanindot nga offer niini.
Sa higayong adunay na-recruit nga nagtrabaho sa ubang kanasuran susama sa Cambodia, Laos, Thailand ug Burma nga magsilbi unta kini nga red flag sa atong mga kababayan.
Gikomperma usab sa BI ug PAOCC nga bisan ang mga BPO companies ug call centers ang gisulod na usab sa mga recruiters.
Gitambagan na lamang sa BI ug PAOCC ang publiko nga mag-amping ug dili magpadani sa mga gitanyag sa ilaha.
