DAVAO CITY – Padayon karun ang pahimangno sa buhatan sa Bureau of Fire Protection (BFP) ngadto sa publiko nga kanunay pa gihapon nga magbinantayon ug i-check kanunay ang mga butang sulod sa panimalay nga mamahimong hinungdang sa sunog.
Kahinumduman nga una ng gibutyag ni SFO4 Ramil Gillado ang Chief Investigator sa BFP Davao City nga mas taas sumala pa ang mga natalang kaso sa sunog sulod sa unang quarter niining tuig kasamtangan apan miubos ang mga natala nga damyos.
Gikanayong sa una nga quarter karung tuig 2022 sukad bulan sa Enero hangtud Marso mitala ang BFP og 96 ka mga fire incident ang dakbayan diin 14 niini natala karon lang bulan sa Marso.
Mikabat usab sa 14 Milyon pesos ang damyos nga gibilin sa sunog.
Nasayran nga mas ubos ang natala nga fire incident sa tuig 2021, diin anaa lang sa 82 ka kaso sa unang kwarter sa tuig.
Apan gihatagan ug katin-awan ni Gillado nga mas dako og damyos nga natala kaniadtong bulan sa Enero hangtud Marso sa milabay nga 2021 nga sunog gumikan mikabat usab sa 23 million pesos ang kabtangan nga naabo.
Dako og kausaban matod pa karon gumikan adunay mga reported nga sunog nga ilang marespondehan pero pag abot sa area napalong na ang kalayo.
Napasabot lang matod pa niini nga mas matngon na ang mga residente hinungdan nga daling mapugngan ang pagkaylap sa sunog.
Atol sa kasaulogan sa Fire Prevention Month karong bulana, subling gihingusgan sa Bureau of Fire Protection Davao City ang kamahinungdanon sa pagtinabangay sa mga residente sa Davao ilabi na sa susama nga kalamidad.
Gikanayong ang kasaulogan sa Fire Prevention Month karung tuiga adunay tema nga “Sa Pag-iwas sa Sunog Hindi ka Nag-iisa”
