DAVAO CITY – Iduso karon sa Davao City Tourism Operations Office ang “Best Face mask” nga usa sa mamahimong feature sa Kadayawan Festival 2022 atol sa subling pagpahigayon sa face to face celebration sa nahisgutang kalihukan.
Gikanayon ni City Tourism Operations Officer Generose Tecson, mamahimong kabahin na sa judging ang best face mask sa Indak-indak sa Kadalanan Street Dancing Competition diin apil na kini sa mahimong customes sa mga partisipante.
Kung si kinsa sumala pa ang adunay pinakanindot nga facemask nga na-haum sa ilang costume, makadawat og bulag nga premyo.
Gawas sa indak-indak, iduso usab sa City Tourism Office nga himuong face to face ang Pamulak sa Kadayawan Float Parade, Pitik sa Kadayawan Percussions Competition, ug Sayaw Kadayawan nga susamang mga tourist attractions matag Kadayawan Festival.
Apan gumikan kay naa lamang gihapon ang pandemya, mamahimong limitado lamang gihapon ang ihap sa mga partisipante sa mga group competitions hinungdan nga mas gamay lamang gihapon ang pondo nga igahin sa lokal nga kagamhanan alang niini karong tuiga.
Ipahigayon ang Kadayawan Festival 2022 gikan Agosto 15 hangtud Agosto 21, 2022 ug naglaom si Tecson nga makatabang ang maong selebrasyon aron subling molagsik ang tourism industry sa lungsod, lakip na ang mga hotels gumikan sa gilaumang pagdagsa sa mga turista aron mosaksi sa Kadayawan.
