Padayon karon nga gitambalan ang usa ka ospital ang dispatcher sa jeep nga naangol human gidunggab sa kauban sa trabaho tungod sa panagbangi sa beer, sumala pa ni PCapt. Hazel Caballero-Tuazon, tigpamaba sa Davao City Police Office (DCPO), nahitabo ang insidente sa Green Meadows, Barangay Sto. Niño, Tugbok District, bandang ala 1 sa kaadlawon, Hulyo 13.
Ang biktima giila nga si alyas “Ata,” 49 anyos, residente sa KM 13, Purok 1, Brgy. Catalunan Pequeño.
Samtang ang suspetsado giilang si Ramil, 49 anyos usab, lumulupyo sa Purok 1, Tangaro Street sa samang barangay.
Subay sa inisyal nga imbestigasyon, gikan sa terminal ang duha ka mga dispatcher ug nag-inom na daan sa ilang paboritong tambayan.
Human niini, mibalhin sila sa usa ka haya sa paryente sa ilang kauban ug didto nagpadayon og inom.
Gumikan sa kasina sa gidaghanon sa beer nga gina-order ni Ata (nga giingong aduna’y financer), gikasab-an siya ni Ramil nga sige lang og kuha og beer bisan wala ikabayad.
Misaka ang tensyon hangtod misangpot kini sa pagpandunggab diin naigo sa tiyan ang biktima.
Giluwas dayon ang biktima ug gidala sa ospital.
Matud pa sa DCPO, stable na ang kahimtang niini ug posibleng makagawas na sa ospital sulod sa sunod nga adlaw.
Gibutyag usab ni Tuazon nga aduna nay dugay nga panagbingkil ang duha sa aspeto sa pag-dispatch sa pasahero, nga posibleng midugang sa tensyon sa maong insidente.
Ang suspetsado karon ginapangita na sa kapulisan na mag atubang og kasong frustrated murder.
Sa laing bahin, gipatin-aw sa DCPO nga walay ebidensya nga ang suspek usab ang responsable sa pagkamatay sa iro sa biktima, nga miresulta sa dugang kalagot sa social media.
