DAVAO CITY – Gi-andam na ang kaso batok sa usa ka 21 anyos nga lalaki nga nasikop sa otoridad human kini nalambigit sa pagpamaligya ug illegal nga druga.
Una ng gilusad sa mga sakop sa Talomo PNP ug PDEA-11 ang operasyon atubangan sa Cortess Printing Corp, Rizal street, Brgy. 36-B, ning siyudad hinungdan nga malampuson nasikop ang suspek nga si CRISTIAN GALLARDO HONDRA alyas “CRISTIAN” (DI WATCHLIST), dunay live in partner, tricycle driver, residente sa Palma Gil Compound, Ma-a ning siyudad.
Atol sa gipahigayon nga transaksiyon tali sa dinakpan ug sa nagpaka-aron ingnon ng buyer, mitunol kini ug usa ka pakete sa ginadili nga druga bugti sa Php. 1,500.00 pesos (buybust money).
Wala na nakapalag ang nahisgutan dihang diretso kini nga giposasan sa otoridad.
Anaa karon sa kustodiya sa kapulisan ang mga nakumpiskang drug items nga magsilbing ebidensiya sa iduso nga kaso.
Gipaslak na karon ang suspek sa presohan ug mag-atubang kini ug kasong kalapasan sa Republic Act 9165 kun Comprehensive Dangerous Drugs Act of 2002.
