DAVAO CITY – Giimbestigahan na sa Talomo PNP ang insidente kalabot sa usa ka bata nga nalumos sa kanal duol sa nagpadayon nga road widening sa Sitio Kalubihan Catalunan Grande ning dakbayan.
Kahinumduman nga pasado alas singko kagahapon sa hapon nakita na lamang sa usa ka Glenn Reborda ang iyang 10 anyos nga igsuon nga si John Mark nga naglutaw-lutaw sa kanal nga bahin kilid sa usa ka subdivision sa nahisgutan nga lugar.
Gikanayong pasado alas tres sa hapon ulahing nakita ang biktima nga nagdula-dula sa lugar hangtud nga nakita na lamang kini nga naglutaw.
Gisulayan pa pagtabang sa mga mirespondeng sakop a Central 911 si John Mark apan nawad-an na kini ug pulso.
Nagtuo ang otoridad nga nalumos lamang ang biktima apan ila pa gihapon nga panubayan kung walay foul play sa maong insidente.
Samtang, gipahiluna na ang patay’ng lawas sa bata sa ka lokal nga punerarya sa Toril ning siyudad.
