Miuyon si Davao City Mayor Sebastian ‘Baste’ Duterte sa nahimong panawagan sa mga delivery riders ning siyudad nga tanggalon ang business permits isip rekisitos sa ilang pagbiyahe.
Gani, gikatakdang amyendahan ang lokal nga ordinansa aron mas sayon ang proseso alang sa riders ug ipaagi kini sa lokal nga balaod aron mapatuman og husto.
Gipasabot sab sa maong mayor nga dili angay ikonsidera ang mga delivery riders isip tradisyonal nga negosyo, sama sa sari-sari store gumikan kasagaran niini walay igo nga kapital ug limitado lamang ang kita.
Gihulagway sab niini ang papel sa mga riders isip “modern-day heroes” gumikan sa pagluwas sa adlaw-adlaw nga panginahanglanon sa mga katawhan.
Sa pikas bahin, wa malikayan nga batikoson sa mayor ang mga politikong mogamit sa maong isyu isip politikal nga armas, ilabi na atol sa eleksyon.
Hinoon, gipasalig niini nga dugay nang nagalihok si Kon. Zozobrado alang sa pagsulbad sa maong isyu.
