Gibutyag ni Davao City Mayor Sebastian Baste Duterte nga ang tanan nga pangutana ngadto sa iyahang amahan labot sa war on drugs kaniadtong naglingkod pa kini isip pangulo sa nasud, maoy natubag niya tanan atol sa gipahigayong Senate Blue Ribbon Committee hearing niadtong adlawong Lunes.
Sumala pa ni Baste nga klaro matud pa sa katawhang pilipino nga seryoso matud pa ang iyahang amahan nga si kanhi Pangulo Rodrigo Duterte labot sa paghatag og proteksyon ngadto sa mga Pilipino aron malayo kini sa iligal nga droga, hinungdan nga mideklara kini og gyera batok sa maong ginadili nga droga kaniadto sa panahon pa sa iyahang administrasyon.
Dugang pa sa batan-ong Duterte nga naka suporta matud pa siya sa mga gipangluwat nga mga pamahayag sa iyahang amahan, atol sa gipahigayong pagdungog sa senado, hilabi na sa pagpaklaro sa kanhing Pangulo nga buhaton pa gihapon matud pa niya og usab ang maong pagpahigayon og gubat batok sa iligal nga droga ugaling mahatagan sumala pa kini og laing higayon.
Gitataw pa niini nga himuon matud pa kining “doblado” kon mas pakusgan pa ang pagpaningkamot aron nga mapakgang ang dugay na nga problema sa nasud, diin nagdala kana og tumang kahasol ug kasamok sa katilingban.
Lakip sa gigarantiya sa Mayor nga sigurado matud pa siya nga daghang Pilipino ang muuyon gayod sa gitindugan nga prinsipyo sa iyahang amahan.
